LGU-Ivisan pagasabton ang tanan nga galastuson sa pagpalubong sa dalagita nga ginbuno-patay sang suspek nga taga-Iloilo

ROXAS CITY – Pagasabton sang Local Government Unit (LGU)-Ivisan ang tanan nga galastuson sa pagpalubong sa 14-anyos nga dalagita nga ginbuno-patay sang damlag lang sa Barangay Poblacion Sur, Ivisan, Capiz.

Ini ang ginpahayag ni Ivisan Mayor Felipe Neri Yap, sang mainterview sang Bombo Radyo.

Suno sa alkalde, halin sa lungon tubtob nitso paga-abagahon sang munisipyo ang balaydan agud indi na magproblema pa ang nabilin nga pamilya sang biktima.

Maga-bulig man ang opisina sang alkalde nga makapangayo sang bulig sa Capiz Government para sa dugang nga galastuson.

Kaangut diri, ginakasubo ni Yap ang natabo ilabi na nga menor de edad ang nangin biktima sang brutal nga pagpatay.