ROXAS CITY – Nagtalana sang isa ka bulan nga kalawigon ang LGU-President Roxas agud masettle sang mga vendors ang ila nga balayran sa kada bulan nga renta sa merkado publiko.
Ini ang ginkumpirmar ni Mayor Receliste Escolin sang mainterview sang Bombo Radyo.
Suno diri, antes pa ang national kag lokal eleksyon nagpadala na ang LGU sa mga nagarenta sa merkado nga magbayad na sang ila nga renta kag magkuha sang business permit.
Apang, tubtob sa karon pila lamang ka mga vendors ang nagpalapit sa munisipyo kag nagbayad.
Bangud sini, ginpatawag ni Escolin ang mga vendors sa isa ka pagsinapol agud mahinalaan ang isyu may kaangtanan sa merkado publiko.
Suno kay Escolin, nahinalaan ang ordinansa nga kun indi makabayad sang tatlo ka bulan nga renta ang isa ka vendor obligado ini nga isarado ang iya pwesto.
Sumugod subong pagahatagan lamang sang 30 diyas ukon isa ka bulan ang mga vendors nga magsettle sang ila renta kag makakuha sang mayor kag business permit. Nagpanindugan man ang alkalde nga ginapanag-iyahan sang LGU-Pres, Roxas ang merkado bangud hawid sini ang deed of donation nga pamatuod nga gindonate sang tag-iya ang merkado sa LGU.
