Nagpatigayon sang symposium ang Local Government Unit ukon LGU sang Dumarao, Capiz, agud mabuligan kag magiyahan ang mga tawo nga nagaatubang sang mabug-at nga problema sa ila kabuhi.
Ini kasunod sang apat ka kaso sang suicide nga nabalhag sa nasambit nga banwa.
Sa interview sang Bombo Radyo kay Dumarao, Capiz Mayor Atty. Mateo Hachuela, iya ginpahayag nga kinahanglan nga mahatagan sang nagaigo nga pag-atipan ang mga tawo nga may problema sa panghuna-huna.
Suno pa sa alkalde, posible nga isa sa mga rason sang problema sa mental health amo ang bullying kag paggamit sang illegal nga droga.
Ginpahayag man sini nga importante nga ipaintindi sa tanan nga tuman ka importante ang kabuhi kag nagakadapat nga magpangayo sang bulig kon may ginapangatubang nga mabug-at nga problema.
Nahibaluan nga yara na sa 62 ka kaso sang suicide ang na-record sa probinsya sang Capiz sang tuig 2025.
