Nagpatigayon sang clearing operation sa public market sa banwa sang President Roxas, Capiz para gub-on ang nagasablag sa alagyan sang pila ka mga camarin type nga pwesto .
Ginpahayag ni Mayor Receliste Tanoy Escolin nga pagpadayon ini nga operasyon nga ginsuguran sang nagligad nga bulan agud mapahangup sa isa ka pamilya nga nag-ukupar sang 3 ka camarin type nga pwesto nga kinahanglan nila nga kuhaon ang nagaserbe nga harang sa area.
Ginkumpirma sang alkalde nga may nagpamalabag kag may nagpanawag pa sa ila kilala nga mga personalidad apang wala sila nalingkag kag ginpadayon ang clearing operation kasunod ang pagpa-intiende nga ila lamang ginasunod ang nakapagkit sa ordinansa.
Samtang magapalab-ot sang Motion for Reconsideration (MR) ang kampo sang Local Government Unit (LGU) sang banwa sang President Roxas sa korte matapos nga napierde sila sa ginpasaka sa ila nga interpleader case sang isa ka botika sa sulod sang merkado publiko.
Nahibaluan nga ginadumilian ang LGU nga magpanukot sang balayaran sa gina-ukupahan nga stall sang amo nga pharmacy.
Apang ginklaro ni Mayor Escolin nga indi ang tanan nga stall sa merkado ang sakup sang nangin desisyon sang korte sa kaso nga interpleader kundi ang nahinambitan lamang nga botika
Aminado man ang alkalde nga wala pa totally na-implementarf ang marker ordinance bangud dapat nga per square meter ang pagsuluktan sang maga-ukupar sang isa ka stall ukon camarin type nga pwesto.
