Nagpahanumdom ang local government unit sang Sigma, Capiz sa publiko nga sundon ang mga regulasyon sa nagahilapit nga pagsaulog sang Undas.
Sa interview sang Bombo Radyo kay Sigma, Capiz Mayor Dante Rizal Eslabon, iya ginpahayag nga lakip sa mga patakaran ang pagsunod sa speed limit sa banwa agud malikawan ang mga aksidente sa dalan.
Suno kay Eslabon, ginadumilian man ang pagdala sang mga matalom nga bagay kag armas, pagkonsumo sang makahulubog nga ilimnon, kag paggamit sang mga speaker nga mahimo makadisturbo sa iban nga nagabisita sa patyo.
Dugang pa sang alkalde, pagatutukan man sang banwa ang pagdumala sang trapiko, ilabi na sa atubang sang mga patyo, agud malikawan ang pagpugok sang mga salakyan kag masiguro ang hapsay nga pag-agi sang mga motorista.
