SIGMA, CAPIZ – Ginakabig maayo nga tikang sang Local Government Unit sang banwa sang Sigma ang paghatag sang bugas kag cash assistance sang Local Government Unit sang General Santos City sa mga delegado sang Capiz sa Batang Pinoy 2025.
Sa interview sang Bombo Radyo kay Mayor Dante Rizal Eslabon, iya ginpahayag nga daku gid ang iya pagpasalamat sa bulig nga gintanyag sang Local Government Unit sang General Santos City kag wala niya ini ginakabig nga insulto bangud bilang host city sang Batang Pinoy, naulikdan ang syudad ang mga delegado halin sa nagkalain-lain nga lugar.
Suno kay Mayor Eslabon, may ginhatag man nga allowance ang ila talatapan sa mga nagpasakop sa Batang Pinoy 2025 antes ini magpadulong sa General Santos City.
Pahayag pa niya, may yara sang ordinansa ang banwa sang Sigma kun sa diin may incentive nga ginahatag sa kada medalya nga mapauli sang mga atleta sa national, regional ukon sa provincial level.
Nahibaluan nga nakakuha sang bulawan nga medalya si Angelica Belandres nga taga Poblacion Norte, Sigma, sa 100 meter hurdles under 15 sa nagapadayon nga Batang Pinoy 2025.
Dugang pa sang natungdan, lauman nga padayon nga pasangkaron ang mga sports development program sa banwa sang Sigma agud mas masuportahan ang mga atleta nga nagapasakop sa nagkalain-lain nga sports.
Interviewed by: Bombo Francis Biñas via Bombohanay sa Udto
