ROXAS CITY – Nagpalab-ot sang bulig ang Local Government Unit (LGU) Tapaz sa pamilya sang napatay nga ginapahayag miyembro sang rebelde nga grupo, matapos ang nagluntad nga engkwentro.
Sa interview sang Bombo Radyo kay Roberto ‘Nonong’ Palomar alkalde sa banwa sang Tapaz, ginpahayag sini nga sang nahibaluan nila ang natabo gilayon sila nagpalab-ot sang bulig.
Matandaan napatay sa engkwentro sa tunga sang 82nd Infantry Batallion Philippine Army kag rebelde nga grupo sa Sito Agdalusan, Barangay Jayobo, Lambunao Iloilo si Jemar Diaz 21-anyos sang damlag lang.
Suno sa alkalde, nagpakig-angut sila sa iban nga mga ahensya agud asikasuhon ang pila ka mga dokumento nga kinahanglanon agud mapapauli sa ila banwa si Diaz kag mahatagan sang pormal nga lubong.
Isa lamang ini ka pamatuod suno kay Palomar, nga ginahatagan sa gihapon sang prebelihiyo ang mga kauuturan nga ang gobyerno handa nga maghatag sang bulig sa tion sang kinahanglanon.
Ginpakigbahin man sini nga indi madula ang posibilidad nga madamo sa gihapon nga mga residente sang ila banwa ang naganyat nga magsulod sa amu nga grupo bangud sa kapigaduhon, partikular sa may bahin sang Barangay Buri kung sa diin 22 ka mga barangay diri ang wala pa sang dalan rason nga madali lamang sila ma-engganyo.
Bangud sini, gina-amat-amat na suno diri sang LGU Tapaz nga mapahamtangan ini sang dalan apisar nga indi ini madali, nagalaum sa gihapon ang alkalde nga matuman ini.
