ROXAS CITY – Ginatun-an karon sang lokal nga gobyerno sang siyudad ang padayon nga pagduging sang mga badjao sa Roxas City.
Ini ang ginpahayag ni City Social Welfare and Development Office (CSWDO) head Monette Beluso sang mainterview sang Bombo Radyo Roxas.
Suno kay Beluso nga ginatun-an na sang talatapan kun ano ang ila masunod nga tikang para sa mga badjao nga nagapangayo-kayo sa palibot sang siyudad partikular na sa mga pampubliko nga lugar.
Nahibaluan nga una na nila gintipon ang mga badjao kag gindala sa Iloilo para idul-ong sa Mindanao.
Ginpahayag pa ni Beluso nga may pila man ka mga badjao nga nagaestar na sa siyudad kag naganegosyo.
Ginpasiguro naman sang talatapan sa tion nga makaangkon sang problema natuhoy sa mga badjao diri na sila magahimo sang paagi agud nga ibalik gilayon ang mga ini sa ila ginhalinan nga lugar kag indi na diri makabalik sa siyudad sang Roxas.
Magluwas diri, padayon man nila nga gina-validate kag gina-tsekyar ang status sang pagpangabuhi sang mga badjao sa siyudad agud kun may yara sang probema nakahanda man ang gobyerno nga magbulig sa ila.
Samtang, magapatigayon pa sila sang pagsinapol kaupod ang iban pa nga ahensya sang gobyerno agud istoryahan ang long term solution sa nasambit nga problema.
