ROXAS CITY – Nagpanindugan ang Liberal Party nga dapat separado ang pagboto sang Kamara kag Senado para sa constituent assembly sa isyu sang pag-amyenda sa Saligang Batas.
Suno kay Capiz 1st District Representative Emmanuel Billones Sr., sa exclusive interview sang Bombo Radyo Roxas, nga tunga sa karon ang ila nga grupo sa isyu sang constituent assembly.
Apang sila nga nagapabor sa Con-Ass ang nagpanindugan nga dapat separado ang pagboto sang Kamara kag Senado.
Nagapati man ang kongresista nga indi dapat nga padasigon ang pag-amyenda sa konstitusyon sa baylo, tun-an ini sang maayo bangud importante ini sa pumuluyong filipinhon.
Suno pa diri nga dapat maintindihan sang mga pumuluyo ang federalismo kag kung ano ang matuga sini sa pungsod kun ipatuman na ang federal form of government sa Pilipinas.
