ROXAS CITY– Wala sang aksyon nga patigayunon ang Liberal Party natuhoy sa pagdalahig kay anay Department of the Interior and Local Government ukon DILG secretary Mar Roxas nga protector sang mga drug lord sa Western Visayas.
Suno sa LP provincial chairman nga si Capiz Gov. Antonio del Rosarionga kabahin lamang ini sang paghingabot kay Roxas kag pamulitika ang yara sa likod sini.
Ginpahayag pa ni del Rosario nga indi sang salapakon ang mga ginbuyagyag sang bagman nga si Ricky Serenio sang Beria Drug Group bangud wala man ini sang kredibilidad kag mas mapatihan pa ang mga bakero kun ikumparar sa iya.
Suno pa sa iya nga indi na sila magfile sang anuman nga panumbungon batuk kay Serenio matapos gin-ulamid ang pangalan nanday Roxas, Sen. Franklin Drilon kag Iloilo City Mayor Jed Mabilog nga lunsay gikan sa partido liberal.
Indi naman luyag sang partido nga palawigon pa ang isyu bangud ginakabig man nila ini nga kabutigan kag wala sang balasehan.
Nagpanawagan pa ang gobernador nga kuntani untatan na ang pamulitika bangud madugay naman nga natapos ang election
