Nagapanawagan ang Liberal Youth nga daku nga kapaslawan sa ika-lima nga State of the Nation Address (SONA) ni President Ferdinand Marcos Jr ang wala paglakip sang Anti-Political Dynasty Act, nga madugay na nga pending sa Kongreso sa pihak sang mandato sang 1987 Constitution.
Sa interview sang Bombo Radyo kay Aldous Noel Demafeliz, National Chairperson of the Liberal Youth, iya ginpahayag nga kuntani hatagan sang aksyon sang administrasyon ipasar ang hagna agud tapuson ang padayon nga pagdominar sang mga political dynasties sa pungsod.
Suno kay Demafeliz, ang pagpasar sang Anti-Political Dynasty Act isa ka importante nga tikang agud mahatagan sang patas nga oportunidad ang iban pa nga kwalipikado nga mga Pilipino nga makasulod sa serbisyo publiko kag mapabaskog ang demokratiko nga proseso sang eleksyon.
Pahayag pa niya, apisar ginpakigbahin sang Presidente ang nagkalainlain nga mga isyu sa ekonomiya, imprastraktura, edukasyon kag iban pa nga mga programa sang gobyerno, ang iya kapaslawan sa pagsambit sang political dynasty ang may direkta nga epekto sa accountability, representasyon kag kalidad sang pagdumala.
Matandaan nga ang Artikulo II, Seksyon 26 sang 1987 nga Konstitusyon nagasiling nga ang political dynasty ang ginadumilian sang kasuguan, apang tubtub subong, wala pa sang Anti-Political Dynasty Act nga ginpasar sa pagpatuman sang nasambit nga probisyon.
