Ginaduso ni Senator Erwin Tulfo ang isa ka hagna nga magahatag sang libre nga professional licensure examinations para sa kwalipikado nga indigent Filipinos.
Sa idalom sang Senate Bill No. 2035 ukon ang “Free Professional Examinations Act,” indi na pagsukton sang examination fees ang mga indigent examinees sa board, civil service, kag bar examinations.
Suno kay Tulfo, madamo sang mga graduates ang indi na makakuha sang lisensya bangud sa kakulang sang kwarta para sa examination fees, gani napilitan nga gilayon nga magsulod sa trabaho.
Sakop man sang hagna ang mga examination sang Professional Regulation Commission, Civil Service Commission, kag Supreme Court of the Philippines para sa Bar Examinations.
Sa idalom sang proposal, ang isa ka “qualified indigent” ang igadeterminar sang Department of Social Welfare and Development (DSWD), nga magahatag sang certification nga igapresentar sa PRC, CSC, ukon Supreme Court bilang basehan para sa exemption.
Para malikawan ang pag-abuso sa benepisyo, ang paggamit sini limitado lamang sa makaisa kada tuig para sa tagsa ka aplikante.
