ROXAS CITY – Isa sa mga plataporma ni Barangay Kagawad Levi Bacas Diaz sang Barangay Banica, ang pagpatigayon sang libre nga kasal sa iya mga pumuluyo sang ini nagapapili pa lamang.
Sa interview sang Bombo Radyo kay Diaz, ginpahayag sini nga ini nga programa iya ginpromisa sa iya kaugalingon nga pananglitan siya ang magadaog iya tinguhaan nga mapakasal ang mga magpartner nga wala pa makasal.
Suno diri sa iya pagdaog gilayon siya nga nagsugod sa pagpangayo sang bulig sa ila mga Barangay Health Workers (BHW) agud hibaluon ang mga magpartner nga wala pa makasal.
Mahibaluan nga 22 ka mga magpartner ang nagpalista sa ila talatapan apang 8 lamang ang natigayon nga maka-comply sang mga requirements kag isa diri ang nagback-out.
Pahayag sang kagawad nga makabig niya nga Luck 7 ang mga natigayon nga makasal kung sa diin ginpatigayon sa St. John Paul Parish II sa Barangay Banica.
Dugang pa sini nga ini nga programa ang bukas sa tatlo ka mga barangay nga ginakalakipan sang Barangay Bato, Tanza, kag Banica.
Kaangut sini sa palaabuton nga kaadlawan ni Diaz plano sini nga magpatigayon sang adult baptism para sa mga pumuluyo nga wala pa mabunyagan.
Mensahe sang kagawad sa mga bag-ong kasal nga kun tani mangin maayo ang ila pag-upod kag indi pagtugutan nga mangin rason sang away ang kwarta bangud nagapati ini nga ang problema yara ini sa kabuhi apang ang Diyos wala nagapabaya nga maghatag sang solusyon.
