Nagbinuligay ang Department of Information and Communications Technology (DICT) kag mga telecommunication companies nga Globe Telecom kag PLDT-Smart agud maghatag sang libre nga internet kag iban pa nga serbisyo sa komunikasyon sa mga lugar sa Mindanao nga naapektuhan sang magnitude 7.8 nga linog.
Lakip sa ginpatuman nga mga tikang amo ang pagdeploy sang Starlink satellite kits, charging stations kag libre nga WiFi sa mga evacuation centers, command centers kag iban pa nga importante nga lugar sa Sarangani kag nagkalain-lain nga bahin sang SOCCSKSARGEN.
Naghatag man ang Globe sang libre nga data kag messaging services sa mga apektado nga kostumer sa South Cotabato, Sultan Kudarat kag Sarangani paagi sa satellite-to-mobile technology. Samtang, nagbutang naman ang PLDT kag Smart sang communication support sa General Santos City agud mapadasig ang koordinasyon sang mga responder kag lokal nga panguluhan sa tunga sang recovery operations.
Suno sa DICT, ang inisyatibo kabahin sang tikang sang gobyerno agud masiguro nga nagapadayon ang komunikasyon kag koordinasyon sa tunga sang kalamidad, labi na sa mga komunidad nga naapektuhan sang linog.
