ROXAS CITY – Kadungan sa pagbukas sang klase buwas nga adlaw sang Lunes, Agosto 22, pagasuguran man sang Barangay Baybay SK Council ang ila programa nga libreng-sakay program ‘schools edition’ para sa mga estudyante sang ila barangay.
Sa interview sang Bombo Radyo kay Hon. Earl Valencia, SK Chairman sang Brgy. Baybay, Roxas City, suno diri nga tinutuyo sini nga programa amu ang makabulig sang gamay sa mga estudyante ilabi na nga nagataas ang presyo sa produktong petrolyo.
Kada alas-6 sa aga, magatipon sang pasahero nga estudyante ukon kaupod nila nga ginikanan sa ila Barangay hall, kag igadul-ong ang mga ini sa ila tagsa-tagsa nga mga eskwelahan.
Pagagamiton diri ang duha tubtob tatlo ka pribado nga mga salakyan, nga magdul-ong sa mga estudyante sa ila bulothoan, duha ka beses sa aga.
Mahimo man suno diri nga makasakay ang mga indi sang taga-Brgy. Baybay kun may yara sang bakante, apang ini nga programa ang ekslusibo sa karon sa ila mga estudyante sa Baybay.
Ginpahayag man ni Valencia nga indi ini funded sang SK, sa baylo, ini nga proyekto ang initiyatibo sang ila SK council.
Pagatinguhaan man sini nga makighinala sa ila Barangay Council agud matigayon nga mapondohan kag mapalawig ini nga programa.
Yari ang mga ruta nga pagaagyan sang libreng-sakay:
From Brgy. hall sang Brgy. Baybay – Dumulog NHS – Don Conrado Barrios Memorial School – CPC Blvd. – PMRMS (North) – PMRMS (South) – CPC Main – CAPSU Main – St. Anthony – Brgy. hall Brgy. Baybay.
