ROXAS CITY – Dakup ang duha ka miyembro sang ginapatihan nga notoryus nga hold-up group sa syudad samtang nagapatrolya ang mga pulis sa Premier de Mayo St., Barangay 9, Roxas City.
Apang gindala sa ospital si Roger Jimenez 24-anyos sang Barangay Switch, Tapaz matapos natiruhan sa tiil ni SPO2 Antonio Buenvinida sang magtuyo nga magpalagyo kag magbato samtang yara na sa karsel ang isa pa ka suspek nga si Antonio Beldia XII matapos nalagas ni PO2 Junvic Ganzon.
Sa exclusive interview sang Bombo Radyo Roxas kay Superintendent Dante Tayco, hepe sang Roxas City PNP, ginpahayag sini nga aksidente ang pagkadakup sa mga suspek bangud nagapatrolya ang mga pulis kag ila naagyan si Jimenez nga may ginpakita nga pusil kay Beldia, rason nga ini ang ila nga ginpalapitan.
Matapos nagpakilala ang mga pulis, hinali na lamang nagdalagan kag nagbunot sang pusil si Jimenez, apang naunahan ini ni PO2 Buenvenida samtang nalagas ni PO2 Ganzon ang nagtuyo nga magpalagyo nga si Beldia.
Samtang gin-ako ni Superintendent Tayco nga positibo nga na-identify sang mga biktima si Jimenez nga amo ang nagpanguna sa paghold-up sa ila.
Apang sa pagpati nga nakabilanggo ini sa Capiz Rehabilitation Center sa pareho man nga kaso nagpangduha duha ini sa nangin pahayag sang mga biktima.
Nasiguro lamang nila nga si Jimenez ang yara sa likod sang serye nga paghold-up matapos nakumpirma nga nakaguwa na ini pila ka bulan ang nakaligad kag sa pag-identify sa iya sang mga biktima.
Nahibaluan pa nga antes ang insedente napasakaan na sang kaso nga robbery si Jimenez nga ginaalegar lider sang grupo.
