Ginakabig sang Liga ng mga Barangay sa Roxas City nga dako nga bulig sa mga kabarangayan ang P200,000 nga lifeline subsidy nga igahatag sa tanan nga mga barangay sa bug-os nga pungsod.
Sa interview sang Bombo Radyo kay Roberto Ross Roldan, Association of Barangay Captains President sang syudad, iya ginpahayag nga ang P100,000 sang pundo igahatag para sa educational assistance sang mga kabataan nga poorest of the poor sa tagsa ka barangay agud makabulig sa ila pag-eskwela.
Ang nabilin naman nga P100,000 pagagamiton sang mga kinahanglanon sang barangay pareho sang streetlights, patrol vehicles, Closed-Circuit Television cameras, kag power generators para sa health centers kag evacuation centers.
Suno pa kay Roldan, ginasiguro nila nga magamit sang insakto ang pundo agud makabenepisyo ang mga pumuluyo.
Nagpasalamat man ini sa gobyerno bangud sa amo nga programa nga makabulig gid sa mga komunidad kag residente.
