Nagpaiway nga magtambong ang Liga ng mga Barangay sa Roxas City sa Liga ng mga Barangay National Congress sa Baguio City bangud sa krisis nga ginapangatubang sang pungsod sa gatong.
Sa interview sang Bombo Radyo kay Punong Barangay Roberto Ross Roldan, President sang Liga ng mga Barangay Roxas City, iya ginpahayag nga ang nasambit nga pagpaiway ang bangud man sa mandu sang Department of Interior and Local Government (DILG) kag sandig sa Memorandum Circular No. 114 nga ginpagwa sang Office of the President kun sa diin ginamandu ang pagkinot sa paggamit sang gatong lakip na ang paglimita sang official travel.
Suno kay Roldan, una na nga nagpatigayon sangpaghinun-anon ang tanan nga Liga ng mga Barangay Presidents sa probinsya sang Capiz nahanungod sa nasambit nga National Congress apang bangud sa hinali nga pagtibusok sang presyo sang gatong, may nangin pagbag-o sa desisyon nila nga mag-upod.
Pahayag pa niya, sa bilog nga probinsya sang Capiz, ang Liga ng mga Barangay sang syudad sang Roxas ang nagpaiway nga mag-upod.
Nahibaluan nga ang nasambit nga National Congress ang nahanungod sa pagbayluhanay sang mga ideya sang tagsa ka mga Punong Barangay sa pungsod Pilipinas nga mahimo nga magamit sa pagpabaskog kag pagpanami sang mga programa.
Dugang pa sang natungdan, ang ini nga tikang ang kabahin sang pag-amlig sa krisis nga ginapas-an sang mga pumuluyo sa pang-adlaw-adlaw nga pagpangabuhi.
