ROXAS CITY – “Wala ko sila ginapabay-an kag sa pagkamatuod ginahugpong ko ang tanan nga mga Punong Barangay agud mangin maayo ang amun pagsinalayo tanan”.
Ini ang linya nga ginbuy-an ni Roberto Maaw Ross Roldan LIGA President sang Roxas City sang mainterview sang Bombo Radyo.
Ini matapos may nagaguha nga pahayag may kaangtanan sa pagsaylo sang suporta sang iban nga mga Punong Barangay sa pula nga grupo kag wala man lamang suno diri sang may ginahimo nga tikang ang LIGA President.
Suno kay Roldan, agud mangin mabakod pa ang ila pag-updanay sang ila organisasyon nagapatawag siya sang meeting agud pamatian ang mga kinahanglanon sang tagsa ka mga barangay pinaagi sa ila mga Punong Barangay, kag mga opinyon.
Pahayag ni Roldan, sa ginpatigayon nga Congress Seminar nga ginhiwat sa Bacolod kaupod ang mga Punong Barangay kag mga opisyales nangin madinalag-on man ang ila paghinala kag wala sang may nagkompronta sa iya agud hinalaan ang nasambit nga isyu.
Pananglitan suno diri nga may yara sang mga Punong Barangay ang magasaylo sang grupo yara na ina sa ila ang desisyon kag ginaklaro sini nga ang mga nagapalapta sang pahayag batuk sa iya isa ka sala nga impormasyon ang ginapatihan.
Samtang, ginpanindugan man ni Roldan nga wala sila ginapabay-an ni Roxas City Mayor Ronnie Dadivas sa ila mga aktibidad kag sa pagkamatuod suno diri bilog ang suporta nga ginahatag sini sa ila kabaliktaran sa mga nagaguha nga impormasyon nga isa lamang ka pagpangsamad sa ila.
Kumpiyansa man ini nga ang mga Punong Barangay nga yara sa grupo sang alkalde indi madala sa kwarta bilang paon sa ila, apang pananglitan nga madala ang mga ini magprangka lamang kag siguraduhon nga indi maghinulsul sa ulihi sa nangin desisyon.
