ROXAS CITY – Nagpatigayon sang pagsinapol ang pila ka mga Liga Presidents sang tagsa ka kabanwahanan sang probinsya sang Capiz sang nakaligad nga adlaw.
Ini suno kay Kapitan Querubin Pamplona, Provincial Liga President sang Capiz Chapter kag Punong Barangay sang Brgy. Sibariwan banwa sang Dumarao.
Ginpahayag ni Kap Pamplona, gintambungan ni Governor Fredinil Castro ang nasambit nga pagsinapol kun sa diin ila gindiskusyunan ang pila ka mga problema sa probinsya nahanugod sa patag sang ikaayong lawas partikular sa mga ginapangatubang nga Covid-19, Dengue, kag Monkeypox.
Suno diri, ginpangayo ni Gov. Castro ang ila suporta bangud sila ang isa sa mga may katungdanan agud ma-implementar ang health protocols sa tagsa ka kabarangayan kag ginhinyu man sini nga aksyunan ang mga gatuluhaw nga balatian agud gilayon matapna.
Nagpasalig man ang mga Liga Presidents nga pagasuportahan ang luyag ni Gov. Castro nga mangin luwas kag malayo sa balatian ang probinsya sang Capiz kag nagpromisa man ang mga kapitanes nga himuon nila ang ila mga responsibilidad bilang amay sang barangay.
Dugang pa ni Kap Pamplona, kada una nga semana sang bulan ang ila pagpatigayon sang sinapol kag diri sila mahinun-anon natuhoy sa mga problema sa ila nasakpan nga barangay kag magbuligay agud masolusyunan. Nagpasiguro man si Gov. Castro nga kun may problema, bukas ang iya talatapan agud magbulig.
