Lima ang napatay samtang duha ang pilason, kag anum ang nagapabilin nga missing kasunod sang landslide sa Barangay Ngingir, Calanogas, Lanao del Sur.
Base sa preliminary investigation, daku nga bahin sang duta ang narumpag bangud sa wala untat nga pagbubo sang ulan nga nagtabon sa mga residente nga yara sa lugar sang natabo ang insidente.
Padayon ang search, rescue, and retrieval operations sang Calanogas Municipal Police Station sa pagbuligay sang Municipal Disaster Risk Reduction and Management Office (MDRRMO), Bureau of Fire Protection (BFP), local government, barangay officials, kag volunteer rescuers.
Lakip sa mga nadula nga mga persona amo sanday Mujahid Abdulmajid, Mobairah Abdulrashid, Norhasan Abdulrashid, Lilikan Arab, Norlin Ali, kag Norhanima Ali.
Padayon pa ang operasyon sa pihak sang malain nga tyempo sa tuyo nga makit-an ang mga nadula nga indibidwal kag masiguro ang kaluwasan sang mga residente sa lugar.
