BINUNTUCAN, Pontevedra, Capiz – Pilason ang lima ka indibidwal matapos ang nagluntad nga vehicular accident sa Barangay Binuntucan, Pontevedra, Capiz.
Ginkilala ang suspetsado sakay alias Mayong, 61-anyos, kag residente sang Barangay Sangkal, President Roxas, Capiz.
Samtang ang biktima nga ikaduha nga driver ginkilala sakay alias Win, 54-anyos, residente sang Barangay Punta Tabuc, Pontevedra, Capiz. Pasahero sini nga sanday alias Al, 32-anyos, alias Lyn, 37-anyos, alias Denden, 4-anyos nga lunsay residente sang nasambit nga lugar. Ikatlo nga driver nga si alias Tonton, 39-anyos, residente sang Barangay Baltucan, Panitan, Capiz. Ika-apat nga driver nga si alias Monmon, 31-anyos, residente sang Barangay Ilawod, Pontevedra, Capiz.
Sa interview sang Bombo Radyo kay Police Captain Maria Fe T. Umiten, Officer in Charge sang Pontevedra Municipal Police Station, iya ginpahayag nga pasado 9:15 sang aga subong nga adlaw nagluntad ang sunod-sunod nga aksidente kun sa diin nagbunggo ang apat ka salakyan.
Suno kay Umiten ang Driver 1 nga si alias Mayong ang nagabiyahe pakadto sa Poblacion sang Pontevedra sang hinali siya bumunggo sa likod nga bahin sang tricycle nga ginamaneho ni alyas Win.
Base sa impormasyon bangud sa impact, nahinali man ang duha pa ka mga salakyan nga ginamaneho ni alias Tonton kag alias Monmon nga nagabiyahe sa opposite nga direksyon.
Dugang pa sang natungdan, ginpaidalom na sa medical treatment sa Bailan District Hospital sanday alias Win kag iya mga pasahero nga sanday alyas Al, alias Lyn, kag alyas Denden, matapos nga gindala sila sang Pontevedra Emergency Response Team ukon PERT.
