ROXAS CITY – Pilason ang lima tanan ka mga persona, matapos ang nagluntad nga pagbungguanay sang duha ka motorsiklo sa Agtatacay Norte, Sapian, Capiz.
Ginkilala ang driver sang motorsiklo kay alyas “Jay” menor de edad, kag sakay nga si Jinky Evangelio, manunudlo, nga lunsay mga residente sang Brgy. Lonoy, sa amu man nga banwa, samtang ang driver suspek ang ginkilala kay Marvin Salas, 28-anyos kag residente sang Pinyahan, Quezon City apang temporaryo nga nagapuyo sa Poblacion, Sapian Capiz kag mga angkas sini nga sanday Jeckly Orario, 34-anyos, kag JR Ariñez, 34-anyos, nga mga residente sang Poblacion, sa nasambit nga banwa.
Sa impormasyon nga nakuha sang Bombo Radyo Roxas sa Sapian MPS, samtang ginasubay ni Evangelio ang dalan sakay sang iya motorsiklo padulong sa Barangay Lonoy, sa amu nga banwa ginapahayag nga pag-abot sa kurbadahon nga dalan nagpang-agaw sang linya ang driver suspek.
Bangud sa mabaskog nga impact, lunsay nagkalatumba ang magkatuhay nga bahin kag nag-angkon sang patal nga pilas ang nasambit nga mga persona.
Gilayon naman nga ginrespondihan sang katapo sang
MDRRMO Sapian ang mga nagkalapilasan antes ginpadangat sa separado nga mga ospital para sa nagakaigo nga pagbulong.
