Nabatian sang mga kasilingan sang maestra nga ginluthang-patay ang lima ka lupok nagikan sa ila nga balay sa Sitio Burwang, Barangay Linambasan, Jamindan, Capiz.
Ang biktima amo si alyas Jo-Ann, 44-anyos, residente sang nasambit nga lugar kag isa ka manunudlo.
Sa interview sang Bombo Radyo kay Ramon Bandillo, Barangay Tanod, iya ginpahayag nga wala gid sang may nakadipara sa ila nga lugar nga may yara sang makaduluda nga mga hitabo.
Suno kay Bandillo, mabuot kag mabinuligon ang amo nga manunudlo rason nga wala sila nagadahom nga amo ang matabo sa iya.
Pahayag niya, naga-inom-inom upod sang pila ka mga abyan ang maestra antes nga natabo ang insidente.
Nagpahanumdom naman ang natungdan sa publiko nga kun mahimo, pasiguruhon nga nakasirado ang gate sang mga puluy-an agud indi hinali nga makasulod ang mga may malain nga katuyuan.
