CAPIZ – Anum ka mga armas luthang ang ginsungka sang mga persona sa magkatuhay nga mga Municipal Police Station sa probinsya sang Capiz.
Isa ka unit sang homemade magazine feed long barrel shotgun ang ginsungka sa mga kapulisan ni Barangay Kagawad Marjeo Mendoza sang Jangusob, Dumarao, Capiz samtang isa ka unit homemade single shot pistolize shotgun naman ang ginsungka ni BPAT Chief Santiago Chavez sang Barangay Taslan, Dumarao, Capiz.
Sa banwa sang Sigma, boluntaryo nga ginsungka ni Punong Barangay Arthur Legazpi sang Barangay Matangcon, Sigma, Capiz ang isa ka unit sang 12 gauge shotgun without magazine kag wala sang bala sa Sigma Municipal Police Station.
Ginsungka naman sa Panitan PNP ni Punong Barangay Lenny Degoma sang Barangay Cadio, Panitan ang isa ka unit sang homemade 12 gauge shotgun without magazine kag wala sang bala.
Yara naman sa kustodiya sang mga kapulisan ang isa ka unit sang homemade 5.56 millimeter revolver matapos nga ginsungka sang BPAT Member nga si Silno Bargo 48-anyos sang Barangay Poblacion, Pilar, Capiz.
Samtang, boluntaryo naman nga ginsungka sang wala na nagpakilala nga persona sa mga kapulisan sa banwa sang Pontevedra ang iya caliber .38 nga armas luthang.
Kadungan ini sang hugot nga kampanya sang mga kapulisan sa “Tokhang kontra sa armas luthang”.
Ang nasambit nga mga armas luthang yara na karon sa kustodiya sang mga kapulisan kag natalana nga i-turn-over sa FESAGS division para sa nagakaigo nga disposisyon.
