Dungan nga napatay ang lima ka mga kabataan sa Marawi City, matapos malumos samtang nagapaligo sa daku nga suba.
Lakip sa mga napatay amo ang tatlo ka lalaki kag duha ka babayi, nga nagaedad sang pito ka tuig, 10 ka tuig, kag 11 ka tuig.
Gintinguhaan sang mga emergency responders nga salbaron ang mga kabataan, apang gindeklarar ang mga ini nga “dead on arrival”.
Gin-athag man sang mga otoridad nga ang mga kabataan ang nagasakay sa guba nga “refrigerator”, nga ila ginhimo nga sakayan.
Nagtakilid ang sakayan sang mga kabataan, kag isa-isa nga nahulog ang mga biktima sa madalom nga bahin sang daku nga suba, sa diin nakit-an ang lima ka pares sang tsinelas sang mga biktima, pagkatapos sang insidente.
Maswerte naman nga nasalbar ang isa pa ka bata nga naga-edad sang walo ka tuig sa bulig sang mga emergency responders.
