ROXAS CITY-Yara na sa Barangay Quarantine Facility sang Barangay Punta Tabuc ang lima ka mga indibidwal nga contract workers sang isa ka dako nga mall sa avenue nga nagpadulong sa probinsiya nga wala sang nakaigo nga koordinasyon sa siyudad.
Sa inisyal nga pakig-angut sang Bombo Radyo sa kay Punong Barangay Nestor Buenviaje ginpahayag sini nga gilayon nga ginpahamtang sa nasambit nga quarantine facility ang lima ka indibidwal kasunod sang pakig-angut sa ila sang pamunuan sang CDRRMO.
Suno kay Buenviaje lunsay mga contract worker sang dako nga mall ang lima ka mga indibidwal kag nagdayon isa ka boarding house sa nasambit nga barangay.
Samtang ginpasalig naman ni Buenviaje nga hugot ini sila nga pagabantayan sang Barangay Health Emergency Response Team ukon BHERT agud malikawan nga makaguwa kag makalagaw.
