Lima ang kumpirmado nga patay matapos nga nahulog sa madalom nga pil-as ang police patrol vehicle sa Barangay Napangan, Misamis Occidental kahapon sang hapon, Pebrero 13.
Ginkilala sang mga otoridad ang apat ka mga pulis kag isa ka empleyado sang Provincial Tourism Office nga nalakip sa mga napatay.
Ang salakyan ang isa ka Toyota Hilux nga assigned sa Misamis Occidental 2nd Provincial Mobile Force Company (PMFC) kag sakay ang napulo ka mga indibidwal—pito ka miyembro sang Philippine National Police kag tatlo ka tourism staff.
Base sa inisyal nga imbestigasyon, nagaserbe nga security escort ang grupo para sa mga organizers sang Binibining Pilipinas nga nagbisita sa Lake Duminagat.
Samtang nagabiyahe sa dalan sa Sitio Napangan, ginpahayag nga nadulaan sang kontrol ang driver rason nga nagliko ang salakyan sa kilid sang dalan kag nahulog sa pil-as.
Sa bulig sang nagresponde nga mga pulis kag mga residente, gilayon nga gindala sa ospital ang lima pa ka mga pasahero, nga nakaluwas apang yara na sa kritikal nga kondisyon.
Padayon pa nga ginahibalo sang mga imbestigador kun may yara sang mechanical failure ukon problema sa preno ang salakyan, ilabi na nga kilala ang ruta nga delikado bangud sa matapan kag matalom nga kurbada sini.
