ROXAS CITY-Ginkompirmar sang talatapan sang Municipal Disaster Risk Reduction and Management Office-Dumalag nga may yara sang mga kabarangayan nga lubog sa tubig baha sa banwa sang Dumalag kasunod sang pagbubu sang mamunog nga ulan sa probinsiya sang Capiz.
Sa interview sang Bombo Radyo kay Municipal Disaster Risk Reduction and Management-officer Mr. Jovel Dacutan, ginpahayag sini nga lima ka mga kabarangayan sa nasambit nga banwa ang ginlubog sa tubig baha kag flash floods.
Ang mga nasambit nga mga kabarangayan amo ang Barangay Concepcion, San Rafael, Santo Angel, San Jose kag San Roque.
Suno kay Dacutan nga lunsay mga malapit sa kilid sang suba ang mga apektado nga barangay.
Gindugang pa sini nga wala naga-untat ang pagtaas sang lebel sang tubig sa suba bangud nagapanaog ang tubig gikan sa mga kabukiran.
Samtang nagapadayon naman ang panawagan sang talatapan sa mga residente malapit sa mga kasubaan nga mangin alerto sa pagtaas sang lebel sang tubig.
