Arestado ang lima ka indibidwal matapos nagpatigayon sang iligal nga bulang sa Barangay Pawa, Panay, Capiz.
Ang mga nadakpan amo sanday alyas Jo, 44-anyos, alyas Vin, 39-anyos, alyas Je, 40-anyos,alyas Fil, 78-anyos, alyas Ern, 46-anyos nga lunsay residente sang nasambit nga lugar.
Sa interview sang Bombo Radyo kay Police Captain Eric B. Deocampo, Officer in Charge sang Panay Municipal Police Station, iya ginpahayag nga nadakpan sa akto ang mga subject person sa ginpatigayon nga anti-illegal gambling operation sang mga kapulisan sa bulig sang impormasyon halin sa mga pumuluyo.
Suno kay Deocampo, madugay na nila ginamonitor ang iligal nga bulangan sa lugar antes ang pagpatigayon ang operasyon.
Pahayag pa niya, narekober sa operasyon ang anum ka inugbulang nga manok, nagkalain-lain nga gamit sa pagbulang, kag P2,030 nga balor sang ginapatihan nga pusta sa iligal nga aktibidad.
Sa subong, yara na sa paghinakop sang mga otoridad ang mga subject person kag magapangatubang sang kaso sa paglapas sa Presidential Decree No. 449 ukon ang Anti-Illegal Gambling Law.
