-- ADVERTISEMENT --

Ginpahayag ni Department of Trade and Industry (DTI) Secretary Cristina Roque nga ang nasambit nga programa ang ginapaduso sang Pilipinas bilang ini ang nagaserbe nga chairman sang ASEAN subong nga tuig.

Ang mga pungsod nga nagpakita sang interes nga mag-upod sa amo nga programa amo ang Pilipinas, Singapore, Indonesia, Malaysia kag United Arab Emirates.

Dugang pa sang kalihim, magatipon sang reserba nga lana ang mga nasambit nga pungsod sa nagkalain-lain nga lugar sa mga pungsod nga sakop sang ASEAN.

Paagi sini, mangin mas mahapos ang pagkuha sang suplay sang lana kon may matabo nga krisis ukon kakulangon sang suplay, sa baylo nga magbakal pa halin sa malayo nga mga pungsod.

Suno kay Roque, makabulig man ini nga makatipid sa oras kag magamay ang magasto sa pagkuha sang lana bangud mas malapit na ang mga lugar nga ginatipunan sang reserba nga suplay.

-- ADVERTISEMENT --

Samtang, ginpahayag man niya nga ang Economic Research Institute for ASEAN and East Asia (ERIA) ang nagpatigayon sang pagtuon parte sa ASEAN oil stockpiling strategy kag nagpadala sang ila mga rekomendasyon sa nagkalain-lain nga gobyerno agud matalupangdan ang posibilidad sang pagpatuman sini.