Pilason ang lima ka tawo matapos gin-atake sang rocket ang Baghdad International Airport sandig sa Iraqi authorities.
Suno sa Government of Iraq Security Media Cell, lima ka mga rockets ang ginpaulan sa paluparan kag sa kaiping nga mga lugar.
Ang mga pilason ang ginalakipan sang airport workers, security personnel kag isa ka engineer.
Suno sa mga opisyal, pila ka mga rockets ang nagsulod sa airport samtang ang iban ang nag-igo sa malapit nga lugar lakip na ang isa ka water desalination plant.
May mga rockets man nga nag-igo malapit sa presohan nga ginabutangan sang mga suspek halin sa Islamic State kag malapit sa Iraqi airbase nga kaiping lang sang U.S diplomatic facility.
Natukiban sang security forces nga ang rocket launch site ang yara sa al-Radwaniya area, southwest sang Baghdad.
Ginpahayag man sang security sources nga tatlo ka mga drones ang gin-shot down malapit sa airport kadungan sang insidente.
Wala lamang ginagamit sa flights ang airport sa baylo, may yara ini sang dako nga military complex nga may mga bases para sa Iraqi army kag security forces.
May yara man ini sang U.S diplomatic and logistics facility kag central prison sa lugar.
Nahibaluan nga humalin nag-umpisa ang kinagamo sa Middle Wast, ginsirado na sang Iraq ang ila nga airspace kag nag-untat sang madamo nga flights para sa safety sang kadam-an.
