ROXAS CITY – Kumpirmado na sang Roxas City Schools Division Superintendent ang pagpatigayon sang closing rites sang pampubliko kag pribado nga eskwelahan sa syudad sang Roxas.
Sa interview sang Bombo Radyo kay Dr. Feliciano Buenafe Jr., suno diri, gintugutan na sang natungdan nga ahensya ang paghiwat sang limited face-to-face graduation sa mga lugar nga yara sa idalum sang alert level 1 kag 2.
Kalakip sa mga pagsulundan nga kinahanglan tumanon sang isa ka buluthoan amu ang hugot nga pagpatuman sang pagsuksok sang face masks, social distancing kag no shake hands sa ti-on sang graduation day.
Dugang pa ni Buenafe nga 100% sa mga public schools ang kumpirmado na samtang may pila naman ka mga private schools ang mag ginpili ang virtual graduation.
Sa pihak nga bahin, natalana nga igabalhin sa Aklan Division si Buenafe sa Hunyo 6, 2022 sandig sa memorandum nga ginpaguwa sang Office of the Secretary sang Department of Education (DepEd).
