Ginakabig dako nga kadungganan sang Lin-Ay sang Tapaz ang pagpauli sang korona bilang Lin-Ay sang Capiz 2026 sang kakatakop lang nga Hangaway kag Lin-Ay sang Capiz 2026 nga ginhiwat sang Abril 16, 2026 sa Villareal Stadium, Roxas City kadungan sang Capiztahan 2026.
Sa interview sang Bombo Radyo kay Coleen Faye G. Peniero, Lin-Ay sang Capiz 2026 nagikan sa banwa sang Tapaz, iya ginpahayag nga kaangay indi siya sa giahpon nga makapati nga nakuha niya ang titulo kag korona sang amo nga kompetisyon.
Suno kay Peniero, isa ka dako nga bugal ang mapauli ang ika-duha nga korona bilang Lin-Ay sang Capiz sa ila nga banwa.
Sa sulod sang iya nga termino, pagatutukan sini adbokasiya nga ‘Laragway sang Kultura’ sa diin nga nagasentro ini sa pagpakita sang kultura sang Capiz, particular ang Panay-Bukidnon Heritage pamaagi sa nagkalain-lain nga plataporma.
Pahayag niya, para sa mga kabataan nga nagahandom nga mangin representative sang tagsa nila ka mga banwa sa nagkalain-lain nga patag, padayon lang nga saligan ang kaugalingon kag indi magpamati sa mga negatibo nga komento agud malab-ot ang kadalag-an.
Nahibaluan nga sang tinalikdan nga Hangaway kag Lin-Ay 2025, ang banwa man sang Tapaz ang nakakuha sang Lin-Ay sang Capiz 2025 nga titulo.
Nagapasalamat naman ang natungdan sa Local Government Unit sang Tapaz kag sa tanan nga mga tawo nga nagsuporta sa iya nga journey sa amo nga kompetisyon.
