Linibo ka mga panimalay ang pagatakdan sang kuryente antes matapos ang tuig.
Base sa ginpagwa nga report sang Department of Energy (DOE), 5,000 ka mga panimalay gikan sa nagkalain-lain nga bahin sang pungsod ang natalana nga ma-electrify antes matapos ang subong nga tuig.
Magluwas ini sa 17,000 ka mga panimalay nga una na nga gin-target sang nagligad nga mga tinuig sa idalum sang Total Electrification Project (TEP) sang National Electrification Administration (NEA).
Matandaan nga sa State of the Nation Address ni Presidente Ferdinand Marcos Jr., nagatutok ini sa DOE kag NEA agud makonektar ang minilyon ka mga panimalay sang kuryente antes matapos ang iya termino sa 2028.
Base sa datus sang DOE, tubtob sa 2.018 milyones ka mga panimalay nga sa karon wala sang kuryente ang nakasulod na subong sa coverage sang electric cooperatives kag distribution utilities.
Ini mahimo na nga makonektar sa kuryente paagi sa regular nga mga aplikasyon sa serbisyo sa bulig sang mga sakop nga mga kooperatiba.
Ginhatagan pagtamod sang DOE nga nagabuligay sila sa Department of the Interior and Local Government (DILG) agud mapatigayon ang koneksyon, ilabi na sa mga imol nga pamilya.
Lakip sa mga tikang nga mahimo himuon para sa mga ini amo ang mas madasig nga proseso sang pagtugot, kag ang pagnubo ukon bug-os nga pag-waiver sang mga balayran sa koneksyon nga ginapatuman sang mga lokal nga panguluhan, lakip ang iban pa nga nagakaigo nga bulig.
