ROXAS CITY – “Mabudlay nga mapredict ang linog bangud isa ini ka natural phenomenon.”
Ini ang ginpahayag ni Engr. Reynaldo Antioquia sang Philippine Institute of Volcanology and Seismology (PHIVOLCS) Capiz sang mainterview sang Bombo Radyo.
Ba-se sa pagtuon sang nasambit nga ahensya, wala sang insakto nga lugar kun sa diin kag san-o maga-igo ang linog.
Suno kay Antioquia, posible nga mag-igo ang isa ka makusog nga linog kun may yara na ini sang napagkit nga rekord sang nanliligad nga tuig kaangay sang natabo sa naaminhan nga bahin sang Luzon kun sa diin tuig 1990 ang nakerod nga isa sa pinakamabaskog nga linog ang nagtay-og sa Pilipinas nga may 7.7 magnitude.
Pahayag sini kinahanglan mangin alerto kag mangin aligmat ang mga pumuluyo pananglitan liwat nga mag-igo ang mabskog nga linog.
Mahibaluan nga ang Panay Island ang gin-igo sang 7.1 magnitude nga linog sang tuig 1990 kun sa diin nangin epicenter ang probinsya sang Antique.
Bangud sini, posible nga mangin trigger ini nga matabo ang west panay fault kag ma-ekperensyahan sang probinsya sang Capiz kag bug-os nga Panay Island ang makusog nga linog.
Wala nagakalipat ang DOST-PHIVOLCS sa pag-edukar sang dapat himuon sa pagpatukod sang edipisyo agud malikawan ang pagtiphag sang mga propedad.
Pahanumdom sang opisyal, pananglitan may yara sang linog mangin alerto kag indi magpanic, mangita sang safety nga lugar agud indi maigo ukon mahulugan sang nagakahulog nga pagkabutang.
Dugang pa ni Antioquia, mangin preprado sa tanan nga oras bangud ang kalamidad wala sang ginapili nga oras.
