ROXAS CITY – Liwat na nga ginbalik ang linya sang kuryente sa banwa sang Jamindan, matapos nga gin-utod ini kahapon nga adlaw sang Capiz Electric Cooperative (CAPELCO) bangud sa pagtaas sang tubig sa lugar.
Sa interview sang Bombo Radyo kay Bombo Radyo kay Mac Arthur Valdimar alkalde sang banwa sang Jamindan, ginpahayag sini nga sa karun yara na sa yellow level ang suba sa ila nga banwa rason nga ginpakamaayo na sini nga ipabalik ang kuryente sa ila lugar agud indi na haol sa mga residente.
Suno sa alkalde, yara sa 10 ka mga barangay ang apektado sa pagbaha kung sa diin madamo nga mga pumuluyo ang ginpakamaayo nga mag-evacuate sa lamang sa evacuation centers.
Mahibaluan nga naglab-ot sa 200 ka mga pamilya ang nag-evacuate bangud sa kahadlok kag subong man para sa kaluwasan sang ila tagsa ka mga himata kag pinalangga sa kabuhi.
Bangud sini, gilayon nga nagpalab-ot sang bulig kaangay sang mga pagkaon kag iban pa nga mga kinahanglanon ang LGU Jamindan para sa mga residente.
Samtang, dako man ang pagpasalamat sang nasambit nga alkalde sa ginhatag nga 300 food packs nagikan kay Capiz Governor Fredinel “Oto” Castro bangud dako ini suno diri nga bulig sa ila ilabi na sa mga pumuluyo nga gintaop sang baha kag nabudlayan nga makabakal sang pagkaon.
Sa karun, padayon pa suno diri ang ila pagmonitor sa nagkalain-lain nga mga barangay apisar nga nagnubo na ang tubig-baha sa ila nga banwa.
