ROXAS CITY – Ginbawi na ang liquor ban kasunod sa pagpaidalum sa probinsiya sang Capiz sa General Community Quarantine.
Ginpahayag ni Atty. Atlas Catalan nga ginapahanugutan nga makabakal kag mag-inum sang makahulubog nga ilimnon apang dapat nga sa sulod lamang sang balay.
Hugot nga ginadumilian ang pag-inum sa guwa sang balay, mga tindahan ukon mga pampubliko nga lugar.
Samtang magasugod naman ang curfew hour alas 9 sa gab-I tobtob alas 4 sa magaaga.
Gintumod man ni Catalan ang pila sa gihapon nga mga establisemento nga indi pagpahanugutan nga maka-operate kasubong sang gym, sports facilities, sinehan.
Ginadumilian man ang anuman nga pagtipon tipon kasubong sang fiesta, convention, misa kag sa lubong kinahanglan nga malapit lamang nga pamilya ang magtambong .
Sa mga malls mahimo magbukas ang pila ka mga shops sa sulod kasubong sang restaurants, leisure shops, apang kinahanglan nga magpresentar sang ila IDs ang magasulod nga nagapang-edaron sang 21-anyos tobtob 59-anyos kag dapat magsuksok sang face mask.
Sa mga fastfood chains naman dapat take out kag delivery basis lamang ang ila ipatuman kag pagasundon ang social distancing.
Samtang wala pa ginapahanugutan ang pagbukas sang mga computer shops.
Nahibaluan nga natigayon na nga mapalab-ot sa mga kabanwahanan ang EO sang gobernador bilang preparasyon sa pagpaidalum na sa probinsiya sa General Community Quarantine.
