ROXAS CITY – Ginpabutyag ni Mrs. Sylvia Dela Cruz sang Provincial Agriculture Office (PAO) nga ginahulat nila sa karon ang listahan sang mga residente nga apektado sang red tide, sa probinsya, nga kinahanglan isumiter sang mga kabanwahanan sa ila talatapan.
Sa interview sang Bombo Radyo kay Dela Cruz, ginsiling sini nga kahapon nga adlaw, nagtambong ini sa pagsinapol agud hinalaan ang mga tikang sang ila ahensya kag sang lokal nga gobyerno sang probinsya para sa paghatag sang bulig sa mga pumuluyo ilabi na coastal areas nga apektado sa pagkapositibo sa red tide sang aton kalalawran.
Ginpakigbahin man sang Agriculturist nga katapusan nga naka-eksperyensiya sang red tide ang kadagatan sang Capiz sadtong Agosto ukon Setyembre sang tuig 2015 kag na-lift lang ini sang Pebrero 2016.
Gani, wala sang may nakahibalo kun asta san-o magadugay ini nga natural phenomenon.
Nahibaluan nga kada-semana na ang monitoring kag pagkuha sang shellfish meat sample sang katapo sang PAO sa mga apektado nga dagat, kag gilayon nga ginapadala sa BFAR central office agud makahatag sang updates sa mga pumuluyo sa sitwasyon sang red tide sa kalalawran sang probinsya.
