ROXAS CITY – Kinahanglan nga bantayan ang mga lugar nga posible kabigon election watchlist areas sa probinsya sang Capiz, para sa nagahilapit nga Barangay kag SK eleksyon sa Oktobre 2023.
Sa interview sang Bombo Radyo kay Atty. Wil Arceño, Capiz Comelec Provincial Supervisor ginsiling sini nga sa karun wala pa sila nakahinala sang hanay sang Philippine National Police (PNP), Bureau of Fire Protection (BFP) kag Philippine Coast Guard (PCG) agud hinalaan ang mga tikang kag pagsulundan nga kinahanglan i-implementar sa tion sang piniliay.
Mahibaluan nga ang mga nasambit nga ahensya sang gobyerno ang kabulig sang Commission on Election (COMELEC) sa kasubong sini nga mga buluhaton, agud mapabilin ang kalinong kag katawhay sa mga lugar nga ila pahamtangan.
Suno kay Arceño, mas magamo ang Barangay kag SK eleksyon ikumparar sa nasyunal eleksyon bangud mga magpamilya lamang ang naga-kontrahanay sa sining nga pagpiniliay.
Kalakip sa election watchlist areas amo ang banwa sang Pilar, President Roxas bangud sang intense political rivalry ukon may election related incident sang mga tinalikdan nga eleksyon.
Ang mga lugar naman nga may may intense political rivalry kag presensiya sang mga rebelde amu ang mga banwa sang Tapaz, Maayon, Cuartero, Dumarao kag Pontevedra.
Sa datos sang Comelec Capiz, may yara na sang masobra 500,000 nga mga registered voters ang magapasakop sa 2023 Barangay kag SK eleksyon.
Sa karon ginatutukan sang mga otoridad ang nasambit nga mga barangay agud mangin matalunsay ang Barangay kag SK election sa palaabuton nga bulan sang Oktubre.
