Nagapati ang litigation expert nga mabaskog kag bastante na ang mga ebidensiya nga ginpresentar sang prosecution sa issue sang confidential funds sa nagapadayon nga impeachment trial ni Vice President Sara Duterte.
Sa interview sang Bombo Radyo kay Atty. Carlo Ybanez, iya ginpahayag nga sa mga ginapakita nga mga ebidensiya kag testimonya sang mga witnesses, indi na kinahanglan nga damuon pa ang mga testigo nga ipresentar sang prosecution.
Suno kay Ybanez, mahimo na lamang nga dugang ukon pangpa-solid sang kaso ang iban pa nga mga testigo nga ipresentar bangud mabaskog na ang testimonya sang mga nauna nga testigo.
Partikular nga ginatumod ni Ybanez ang duha ka hostile witnesses nga mga empleyado sang Office of the Vice President (OVP).
Pahayag niya, daku ang papel sang kredibilidad sang isa ka testigo kag kalidad sang iya testimonya sa isa ka trial.
Samtang, isa sa mga importante nga legal issue sa impeachment case amo ang pag-establisar sang koneksyon kay Vice President Duterte, ilabi na sa isyu sang confidential funds.
Suno kay Ybanez, may mga nagasiling nga dapat pasabton ang mga tawo sa OVP nga wala nagsunod sa mga proseso, kag responsibilidad sang prosecution nga mapakita nga ang mga natabo may direkta nga koneksyon sa bise presidente.
Kun ma-establisar ini, dira pa lamang pahayag niya nga mahimo sang prosecution nga mapakita kag mapamatud-an ang impeachable offense batok sa bise presidente.
