Nagapati sang isa ka litigation expert nga dapat anay usisaon ang source of income ni Vice President Sara Duterte agud mahibaluan kun may legal kag balido nga basehan ang pagtaas sang iya declared net worth sa mga Statement of Assets, Liabilities and Net Worth ukon SALN.
Ini kasunod sang presentasyon sang prosecution sang mga rekord nga nagapakita sang pagtaas sang iya declared net worth halin P7.25 million sang 2007 tubtob P98.66 million sang 2025.
Sa interview sang Bombo Radyo kay Atty. Jobert Llarde Pahilga, iya ginpahayag nga indi makabig nga illegal ang pagtaas sang net worth kun naghalin ini lehitimo nga income, investments ukon iban pa nga sources.
Suno kay Pahilga, dapat ma-establisar anay kun diin naghalin ang wealth kag mahimo ini ikumpara sa tax records kag flow sang kwarta.
Dugang pa sang natungdan nga kun mapamatud-an nga may tinuyo nga pagbutig sa SALN, mahimo ini mangin basehan sang kaso nga perjury.
