Ginklaro sang Philippine National Police (PNP) nga daan na ang litrato ni Senator Ronald “Bato” Dela Rosa nga nagalapta sa social media kag nagapakita sa iya kaupod ang pila ka indibidwal sa isa ka patyo sa Davao.
Suno kay Police Colonel Allen Rae Co, hepe sang PNP Public Information Office, masobra tatlo na ka tuig ang nagligad halin sang nakuha ang amo nga litrato.
Naglapta liwat ang laragway sa social media kadungan sang pag-obserbar sang Undas, nga nagtuga sang espekulasyon nga nakita ang senador sa Digos City, Davao del Sur.
Nahibaluan nga ginapangita sang mga otoridad si Dela Rosa may kaangtanan sa arrest warrant nga gin-isyu sang International Criminal Court (ICC) sa iya, nga may kaangtanan sa gina-alegar nga mga krimen batok sa “war on drugs” sang nagligad nga administrasyon.
Nagtanyag man sang P50-million nga reward ang Department of the Interior and Local Government (DILG) sa sin-o man nga makahatag sang impormasyon nga magadul-ong sa nahamtangan sang senador.
Sa subong, wala pa makit-an sang mga otoridad ang eksakto nga nahamtangan ni Dela Rosa.
