ROXAS CITY – “Love at first sight” ukon nainlove sa una nga pagkita”!
Ini ang una nga nabatyagan sang live in partner sang 26-anyos nga babaye nga nagwaras kag nagtuyo pa kuntani nga magpanginmatay pinaagi sa paglaslas sang pulso gamit ang ginbuka nga botelya sa Roxas City Public Plaza sa Legaspi Street sang damlag lang.
Sa exclusive interview sang Bombo Radyo Roxas kay alyas James nga na “love at first sight” gid ini sang una makita si alyas Jane tubtob nga nangin madalom na ang ila relasyon nga duha.
Ginpahayag ni James nga nag-upod man sila sa isa ka balay kun sa diin wala sini ginalauman ang batasan ni Jane nga sa tagsa ka mahubog nagamaoy kag nagawaras.
Dugang pa ni James nga wala sa lugar ang masami nga pagselos sang iya nga live in partner rason nga masami na lamang sila nagaaway.
Ini bangud suno kay James bisan sin-o na lamang ang ginaselosan ni Jane, lalaki man ukon babaye.
Magluwas diri, ginaselosan man ni Jane ang tagsa ka pagtulok ni James sa iya mga customer nga nagapatahi sa iya sang sapatos.
Apang, aminado si James nga indi ini silahis kabaliskaran sa alegasyon ni Jane kun sa diin ginapahayag nga nakit-an sini nga may yara sang upod nga lalaki si James sa isa ka lodging house.
Hugot naman nga ginpanginwala ni James ang nasambit nga alegasyon bangud suno sa iya nag-inom lamang sila ni alyas Jomar nga bantay man sang isa ka lodging house kag natabuan nga didto ini natulogan.
Ginpanindugan man ni James nga indi siya bakla bangud suno sa iya madamo ini sang mga babaye kag wala ini sang plano nga magpakigrelasyon sa lalaki.
Matandaan nga ginrespondehan sang mga katapo sang Capiz Emergency Response Team (CERT) si Jane sang nagtuyo ini magpanginmatay matapos nabatian nga may ginaupod-upod nga isa ka lalaki ang iya live-in partner.
Suno diri nga tuman siya nga nasakitan bangud sa pihak sang iya tuman nga pagpalangga kay James, lalaki na ang ginapangita sini.
