ROXAS CITY – Ulihi na nahibaluan ni “Marisel”, live-in partner ni Renante ‘Tunggak’ Banate, nga amu ang ginatudlo nagpatay kay The late Punong Barangay Frederick ‘Dikoy’ Dullano, sang Brgy. Tabuc, Pontevedra, Capiz.
Sa pagpadulong sang Bombo Patrol team sa puloy-an ni “Marisel”, sa sitio Bagasungan, Brgy. Monteflor, banwa sang Pilar, ginpahayag sini nga wala ini nagatenir sa ila balay sa nasambit nga barangay bangud nagatrabaho ini bilang ‘stay-in’ sa ginatrabahuan nga karinderya sa kaiping nga banwa kag ginsukmaan lamang sang balita nga iya live-in partner ang ginatudlo suspek sa krimen.
Indi man ini makapati bangud ang lesensiya ni Renante sa iya sang nagligad nga bulan, amu ang magapadulong sa Antique agud magtrabaho sa construction, apang sumugod sadto, indi na sini makontak ang lalaki.
Suno pa kay “Marisel”, nga antes ang paglakat ni Banate, masami sa bukid ang iya live-in partner bangud nagapananom sang mais kag utanon, nga amu ang ila kaisa ginabaligya.
Aktibo man suno diri nga CVO si Banate sa ila barangay.
Aminado ini nga may nakita siya sadto nga armas-luthang sa paghinakop ni Banate apang, wala makahibalo kun may iligal nga bulohaton ang iya partner.
Nahibaluan nga anum pa lamang ka tuig nga nagaupod ang duha kag may tatlo sila ka tuig nga bata.
Ginkumpirmar man sang 27-anyos nga si “Marisel”, nga kilala niya ang driver sang motorsiklo nga si Gilbert Berte, bangud taga-Monteflor man ang asawa sini.
Sa karon, wala sang mahatag nga lokasyon si “Marisel”, sa ginahamtangan ni Renante bangud ginapanindugan sini nga wala makahibalo sang krimen nga ginakaulamiran sang iya partner.
