ROXAS CITY – Nagdepensa karon ni Dr. Alex Nolasco sang hospital management section sang Roxas Memorial Provincial Hospital matapos liwat nabutang sa kontrobersiya ang ospital sang nagpalya ang generator set kasunod sang power interruption ukon brown out kahapon nga adlaw.
Ginpahayag ni Nolasco nga ang daan nga generator set nga ginbakal pa sang tuig 2005 ang ginagamit sang ospital sa karon samtang ginahulat ang schedule nga pagrepair sini.
Apang kinahanglan ang back up kun buksan kag kaayuhon ang nasambit nga generator set bangud kun matabuan nga magbrown out, mangin daku na gid ang problema.
Ginkumpirma man ni Nolasco nga sa iya pagbisita sa magkatuhay nga mga government hospital sa probinsiya, natukiban sini nga indi lamang ang RMPH ang nagaproblema sa generator set.
Bangud diri nagpakig-angut na sila sa Professional Electrical Engineer (PEE) nga nagrekomendar nga dapat maggamit sang N+3 generator ang RMPH ukon tatlo ang back up.
Samtang nagpaathag naman si Nolasco sa ila kapaslawan nga makatambong sa ginpatawag nga investigation in aid of legislation sang Sangguniang Panlalawigan.
Suno sa opisyal nga natabuan nga masaku sila bangud may yara sang PUI nCoV case ang probinsiya nga ginahatagan sang prayoridad.
