Aminado ang head sang social concern office sang provincial government nga si Arnold Canto nga wala na-antisipar ang pagtumpok sang mga tawo sa paglinyahanay makakuha lamang sang ayuda kahapon.
Ginpahayag ni Canto nga wala sang may naggusto nga makumpol ang mga vendors bangud ang katuyuan sang ayuda nga makabulig piyan piyan sa ginalukdo nga problema sang mga vendors.
Nagpangayo man sang pasaylo si Canto kag naghinyo sang paghangup sa tanan.
Suno diri nga sa baylo pakamalauton ang nasambit nga event, dapat tan-awon sa positibo nga perspektibo nga bahin ang tuyo nga mabuligan ang mga vendors nga wala nalakip sa 1st batch nga nakabaton sang ayuda.
Ginbali man sini ang nagapaguha sang espekulasyon nga may lamud pamulitika ang nasambit nga event.
Suno kay Canto nga wala sang balasehan ang nasambit nga akusasyon sa administrasyon ni Governor Contreras sa diin ginhimo ini para mabuligan ang magagmay nga mga vendors .
Ginsabat man sini ang isyu nga pila ka mga naka-close contact sang gobernador ang nasiplatan sa venue.
Ginpahayag ni Canto nga wala ini sang kamatuoran kag pagpatalang lamang ini agud pakalainon ang Contreras administration.
Sa nagabasol kay Governor Contreras sa liwat sini pagpositibo bangud sa iya masami paglakat, suno kay Canto nga dapat pasalamatan ang amay sang probinsiya bangud pinaagi sa iya pagpanglakaton madamo ini sang napangayuan sang bulig nga iya man ginahatag sa mga Capizeño.
Samtang ginpanindugan ni Canto nga nag-agi sa proper information sa natungdan nga ahensiya sang gobyerno tobtob sa Roxas City government ang patigayunon nga ayuda sa mga vendors kahapon nga adlaw.
