Ginreklamo ni Liza Dino-Esguerra, former chairperson sang Film Development Council of the Philippines (FDCP), nga nadulaan ini sang malahalon nga relo kag laptop gikan sa iya nga checked-in luggage sang nag-abot ini sa Ninoy Aquino International Airport (NAIA).
Suno kay Dino-Esguerra, nga partner ni Aiza ”Ice” Seguerra, wala niya gilayon na-check ang unod sang maleta pag-abot nila sa balay. Sang ginbuksan ini, wala na ang duha ka gamit.
Ginpahayag pa ni Ice Seguerra nga natalupangdan nila nga may hiwa ang maleta nga kaangay gingamitan sang kutsilyo.
Paathag ni Dino-Esguerra, ginbutang niya ang mga gamit sa checked luggage bangud sa limitasyon sang kilohan sa carry-on.
Paathag naman sang airport kag mga otoridad, wala sang nakit-an nga ebidensya nga makahatag sang kasanagan sa natabo.
Apang suno sa pamunuan sang paluparan nga bayaran na lamang ang malahalon nga relo sang kahagugma ni Ice Seguerra apang indi kaupod ang laptop.
Ginhaylo ni Dino-Esguerra ang mga otoridad nga mangin mas maiid-idsa pag-resolba sang mga insidente sang kinawatay sa NAIA.
