ROXAS CITY – Indi kumporme si League of the Municipalities in the Philippines (LMP) Capiz Chapter President kag Mambusao Mayor Leodegario ‘Jun’ Labao Jr. nga mag-agi pa sa gobyerno-probinsiyal ang pondo nga ginpain para sa mga kabanwahanan.
Suno kay Labao nga luyag sini nga ma-download sang mismo mga local chief executives ang pondo nga gintalana para sa ila tagsa ka mga banwa.
Ini agud sila mismo ang magapatuman kag maga-implementar sang ila mga proyekto kag programa.
Suno kay Labao nga kun ang gobyerno-probinsiyal pa ang maga-implementar sini, madula pa sang posible nga madula.
Mahibaluan nga kapin sa 122 milyones pesos ang ginpain nga pondo sang gobyerno-probinsiyal sa Annual Investment Program (AIP) para sa tuig 2020 nga pagakuhaon sa 20 porsyento sang Development Fund para sa mga kabanwahanan.
Kasubong wala naman nagapabor si Capiz governor Esteban Evan ‘Nonoy’ Contreras sa luyag nga matabo ni Labao.
Suno kay Contreras nga pagahinalaan pa nila ang request ni Labao.
Apang ginpasiguro sang gobernador nga mapaabot gid sang gobyerno-probinsiyal ang mga bulig nga nagakadapat nga mabaton sang mga kabanwahanan kag sa ila nasakupan nga mga kabaranggayan.
Ang luyag lamang ni Contreras nga ma-monitor sang husto ang mga igapatuman nga programa kag proyekto.
Gindugang pa sini nga nagakadapat nga magbuligay na lamang ang tanan kag maghugpong para sa madasig nga pag-umwad sang probinsiya.
