ROXAS CITY – Ginkompirmar ni League of Municipalities of the Philippines ukon LMP Capiz Chapter President kag Mambusao Mayor Leodegario Jun Labao Jr., nga wala ini sang plano nga punggan ang pagpuli sang mga Locally Stranded Individuals ukon LSI’s sa probinsya.
Sa interview sang Bombo Radyo kay Labao nga nakonsensya ini kun pagadumilian niya ang pagpapuli sang mga LSI’s sa probinsya ilabi na subong nga bulan sang paskwa.
Ginpahayag sini nga wala man sang problema nga papulion ang mga LSI’s basta magsunod lamang ang mga ini sa mga nagakaigo nga mga minimum health protocols nga ginapatuman sa probinsya.
Kalakip na ang pagpaidalom sa swab test kun sa diin dapat negatibo ang mga ini antes magpauli sa Capiz kag pagpaidalom sa 14 day quarantine.
Mahibaluan nga nagpatigayon sang sinapol ang magkatuhay nga mga ahensya sang gobyerno, MDRRMO, PDRRMO, LMP-Capiz Chapter kaupod si Capiz Gov. Esteban Evan “Nonoy” Contreras sa ESLA sa Barangay Lanot sining siyudad may kaangtanan sa mga concerns ukon problema sa probinsya subong nga pandemya.
